ఆత్మీయులం మేం ఆత్మీయ ఆత్మీయులం

ఆ పరమాత్మ కలిపిన ఆత్మ బంధువులం

అంతరాత్మ కలిసిన దూర బాంధవ్యులం

అవసారార్ధుల సాయం చేయు ఆప్త మిత్రులం

ఆప్తుల   'ఆసరా'గ  నిలిచే విద్యాధికులం

నిరుపేదల అండగా నడిచే  మెగారక్షకులం

సమన్యాయ లక్షముగా కాపుకాచే జనసైనికులం

సమాజసేవ భాద్యతగా కాంక్షించే చిరుసేవకులం

  -  Penned by Sreeni (S. Anil Kumar)

సినీ గీత రచనలతో అజరామరమైన భగవద్గీతలు ప్రవచించిన అక్షర సాహితీ పసిడి సిరి 

వన్నెల చిన్నెల పాటల్లోనూ ఆకాశమంత అర్థాలతో వన్నెతెచ్చిన తెలుగు జాతి వెండి వెన్నెల

సిరివెన్నెల చిత్రంతో మొదలై సిరివెన్నెల పాటతో ముగిసిన తెలుగు భాషా సిరివెన్నెల 

ఆ చదువుల తల్లే నేలపై జారి కలంగా మారి పదనాట్యమాడిన తెలుగు విశ్వవిద్యాలయం మన సిరివెన్నెల

అంతులేని దైన్యములోనూ ఎప్పుడూ ఓటమీ ఒప్పుకోవద్దురా అంటూ యువతను సృజించిన స్పూర్తి ప్రదాత

సాహసం నా పథం రాజసం నా రథం సాగితే ఆపడం సాధ్యమా అంటూ వేల హృదయాలను స్పృశించిన స్థైర్య దాత

విధాత తలపున ప్రభవించినదీ జీవన వేదం లాంటి కొన్ని వేల పాటలను సృష్టించిన గీతా రచయిత

తన రాతలతో తరతరాలను తరింపచేసి కొన్నివేల తలరాతలను మార్చిన నవ మానవ విధాత

జగమంత కుటుంబము తనదిగా ఏకాకి జీవితం జీవించిన విశ్వ కవితా అద్వైత తత్వజ్ఞుడు  

అర్థ శతాబ్ధపు అజ్ఞాన స్వతంత్రాన్ని ప్రశ్నించిన ఇరవైవ శతాబ్దపు మకుటం లేని మహా విజ్ఞుడు

సరసస్వరసుర ఝరీమగు సామవేదసారమే జీవన గీతముగా ప్రతిధ్వనించిన మహా వేదజ్ణుడు

శ్మశాన నిశీధిలో జ్వలిస్తున్న ఆత్మలలో కూడా పాటతో ఆశావాదం నింపి ప్రాణం పోసిన జీవన శాస్త్రజ్ఞుడు

తెల్లారింది లెగండో అని మనిషిలోకి నిద్దుర మత్తుని తన గళముతో జాగృతీకరించిన సహృదయ గాయకుడు

నిగ్గదీసి అడిగి సిగ్గులేని సమాజాన్ని తన ఘాటైన ప్రశ్నలతో లోతైన గాయం చేసిన అభ్యుదయ భావకుడు 

జాబిల్లి అందాల వర్ణనతో జాబిలమ్మకే  జోలపాడి జామురాతిరి జాగారం చేయించిన భాషా కోవిదుడు

తెలుగు భాషకే శ్వాసనందించి నిద్రలేని రాత్రులలో పాటకు ప్రాణం పోసిన నడిరేయి సూర్యుడు - “సిరివెన్నెల”

           -  Penned by Sreeni (S. Anil Kumar)

దగ్గరగా ఉన్నప్పుడు వద్దని దూరంగా పక్కకు జరిగినా

దూరమైనపుడు దగ్గరకాలేదని బిగ్గరగా మధనపడినా

చిన్నప్పుడు తన్నులు తిన్నప్పుడు బాధతో కసురుకున్నా

కాటికే చేరినపుడు అదేకాలి దగ్గర కన్నీరుమున్నీరుగా రోదించినా

మహా శివరాత్రి పర్వదినాన శివైక్యమైన పరమశివుడిలా

సక్రమ మార్గాన్ని నిర్దేశించే జీవన గీతా బోధక శ్రీకృష్ణుడిలా

కొండంత ఆత్శ విశ్వాసాన్ని పెంచే వీర హనుమంతుడిలా

మొక్కకుండానే ఆపదలను తీర్చే నా తండ్రి శ్రీనివాసుడిలా

నా ఆకారంలో వెలసిన నకారపు మమకారం నాన్న

మనలో గుణకారాన్ని హెచ్చించిన భాగహారం నాన్న

కలకలలాడే జీవిత గాలిపటపు ఆధార దారం నాన్న

పరమాత్మ అందించిన రెండు అక్షరాల మణిహారం నాన్న

యాబైఆరు అక్షరాలతో వర్ణించలేని అపార ప్రేమజీవి నాన్న

కష్టాలను మింగి కన్నీళ్లను దిగమింగిన కర్మజీవి నాన్న

ఆత్మసాక్షిగా నాకై శ్రమించి విశ్రమించిన శ్రమజీవి నాన్న

అందుకే నా అంతరాత్మకు ఎప్పుడూ మా నాన్న చిరంజీవే

21 సం క్రితం పరమపదించిన మా నాన్నకి అశ్రు నివాళి 

           -  Penned by Sreeni (S. Anil Kumar)